Эрчим хүчний сайд: Эрчим хүчний салбарын өвөлжилтийн бэлтгэл 75 хувьтай байна

Эрчим хүчний сайд Б.Найдалаа Засгийн газрын хуралдааны дараа мэдээлэл хийлээ. Тэрээр эрчим хүчний салбарын өвөлжилтийн бэлтгэл 75 хувьтай байгаа бөгөөд есдүгээр сарын сүүлээр 100 хувь болно гэв.

Сайд хэлэхдээ, өвлийн цахилгаан чадлын дутагдлыг импортоор нөхөж, ямар ч нөөцгүй ажиллахаар төлөвлөж байна. Цахилгаан станцуудын нэг ч зуух сул зогсохгүй, бүх хүчин чадлаараа ажиллах гэж байгаа. Эрсдэл байгаа ч хязгаарлалт хийхгүй байхыг хичээж ажиллана гэв.

Найман аймгийн 21 суманд нээлттэй сумдын эрчим хүчийг чанартай болгох зорилгоор сонгон шалгаруулалт зарласан. Эрчим хүчний яам эрчим хүчний найдвартай байдлыг дээшлүүлэх зорилгоор багц арга хэмжээ зарлаж байна. Эрчим хүчний аукционыг нууцаар хийх боломжгүй, салбар нээлттэй болсон гэж тэмдэглэв.

Оюутолгойн хэрэглээг 2030 оноос эхлэн дотоодын эрчим хүчээр хангахаар ажиллаж байна. Одоогийн байдлаар энэ төсөлд жилд 140 орчим сая долларыг хөрш улсад төлдөг. Таван толгойн цахилгаан станцыг 2012 оноос ярьсан ч өнөөг хүртэл баригдаагүй байгааг сайд дурдав.

"Гацаагчдаас болоод Монгол Улс бүх төрлийн цахилгаан станцаа барьж чадахгүй өдий хүрсэн. Нүүрсний асар их нөөцтэй байж хэрэглээнийхээ тавны нэгийг гадаадаас гуйж байна. Эрчим хүчний салбар бол улс төржиж болохгүй салбар" гэж Б.Найдалаа хэллээ.