Энэ зун бэлчээрийн ургамлын ургалт сайжирч, таримал ургамлын хөгжил сайн байжээ

2026 оны зуны хугацаанд бэлчээрийн ургамлын ургалт 6 дугаар сарын эхнээс 8 дугаар сарын дунд үе хүртэл аажмаар сайжирсан боловч 8 дугаар сарын сүүлчээр сайн үнэлгээтэй нутгийн эзлэх хувь тодорхой хэмжээгээр буурчээ. Ургалт муу байсан нутгууд гол төлөв говь, тал хээрийн бүсэд байв.

Бэлчээрийн ургамлын ургалтын байдал

• 6 дугаар сарын эхний арав хоногт нийт нутгийн 50 орчим хувьд сайн, 40 орчим хувьд дунд, 10 гаруй хувьд муу үнэлгээтэй байжээ.
• 7 дугаар сард агаарын температур нийт нутгийн 70 гаруй хувьд олон жилийн дунджаас 1.1-3.4°С-аар дулаан, хур тунадас 50 орчим хувьд олон жилийн дунджийн орчим болон түүнээс ахиу байсан нь ургалтад таатай нөлөөлсөн.
• 8 дугаар сарын дунд арав хоногт нийт нутгийн 60 орчим хувьд сайн, 30 гаруй хувьд дунд, 10 орчим хувьд муу үнэлгээтэй болсон.
• 8 дугаар сарын сүүлчээр 50 гаруй хувьд сайн, 30 гаруй хувьд дунд, 10 орчим хувьд муу байв.

Орон зайн тархалт

• Сүхбаатар, Дундговийн зарим, Өмнөговийн цөөн, Ховд, Говь-Алтай, Хэнтийн ганц нэг сумын зарим хэсгээр ургалт муу байв.
• Архангай, Орхон, Сэлэнгэ, Дархан-Уул, Говьсүмбэр, Дорнодын нийт нутаг, Увс, Говь-Алтай, Хөвсгөл, Булган, Өвөрхангай, Төвийн ихэнх, Завхан, Баянхонгор, Хэнтийн зарим, Баян-Өлгий, Ховд, Дундговь, Өмнөговь, Дорноговь, Сүхбаатарын ганц нэг сумын нутгаар сайн, бусад нутгаар дунд зэрэг үнэлгээтэй байна.

Өмнөх жилийн мөн үетэй харьцуулахад бэлчээрийн ургамлын ургац төв болон зүүн аймгуудын зарим сумдын нутгаар нэмэгдсэн боловч баруун болон говийн нутгийн ихэнх хэсэгт буурсан үзүүлэлттэй байна.

Энэ зун ихэнх нутгаар хур тунадас олон жилийн дунджийн орчим болон түүнээс ахиу, агаарын температур олон жилийн дунджаас 1.1-3.8°С-аар дулаан байлаа. Цаг агаарын эдгээр нөхцөл бэлчээрийн ургамлын ургалтад таатай нөлөөлж, ихэнх нутгаар зуншлага хэвийн, газар тариалангийн бүс нутгаар таримал ургамлын ургалт, хөгжил сайн байжээ.