Эмээлт эко аж үйлдвэрийн паркид ДЦС, цэвэрлэх байгууламжийн шав тавив

Нийслэлийн Хан-Уул дүүргийн 13 дугаар хорооны Шар хөвийн хоолойд, хотын төвөөс 30 км-ийн зайд 539 га талбайд Эмээлт эко аж үйлдвэрийн парк байгуулах ажил үргэлжилж байна.

Энэ хүрээнд тус паркийн дулааны цахилгаан станц болон цэвэрлэх байгууламжийн бүтээн байгуулалтын шавыг 2026 оны 9 дүгээр сарын 21-нд тавьсан байна.

Төлөвлөгөөгөөр 24 МВт хүчин чадалтай дулааны цахилгаан станц нь үйлдвэрүүдийг цахилгаан, дулаанаар хангах бөгөөд жилд 665 мянган тонн ус ашиглан 156 сая кВт.ц цахилгаан, 265.6 мянган Гкал дулааны эрчим хүч үйлдвэрлэн түгээх юм. Харин цэвэрлэх байгууламж нь ахуйн болон үйлдвэрийн бохир усыг хоногт 6,700 м³ цэвэрлэх хүчин чадалтай бөгөөд 20,000 м³/хоног хүртэл өргөтгөх боломжтойгоор төлөвлөгдсөн.

Нийслэлийн 2026 оны төсвийн жагсаалтад тусгаснаар эко паркийн дулааны цахилгаан станц, бохир ус цэвэрлэх байгууламжийн ажлыг 2025-2028 онд гүйцэтгэж дуусгахаар төлөвлөсөн бөгөөд нийт төсөв нь 224.6 тэрбум төгрөг. Үүнээс энэ онд 50 тэрбум төгрөгийг зарцуулахаар батжээ.

Эмээлт эко аж үйлдвэрийн парк бүрэн хөгжсөнөөр 5,600 гаруй тогтвортой ажлын байр шинээр бий болж, нийт 1.7 их наяд төгрөгийн орлого бүрдүүлэх, жилд 86.3 тэрбум төгрөгийн татварын орлого төвлөрүүлэх төдийгүй хөрөнгө оруулалтыг 6.7 жилийн хугацаанд нөхөх боломжтой гэж тооцоолжээ.

Тус үйлдвэр жилд 7.5 сая ширхэг арьс шир, 3 мянган тонн ноос, 5.8 мянган тонн ноолуур, 25 мянган тонн мах, 8 мянган тонн дайвар түүхий эдийг боловсруулах хүчин чадалтай.

Хан-Уул дүүргийн нутаг дэвсгэр, Харгиа орчимд үйл ажиллагаа явуулж буй арьс шир, ноос боловсруулах үйлдвэрүүдийг үе шаттайгаар Эмээлтэд төвлөрүүлснээр Хан-Уул дүүргийн 19, 20 дугаар хорооны иргэдийн эрүүл, аюулгүй орчинд амьдрах нөхцөлийг сайжруулах боломж бүрдэх аж.