Эм, эмнэлгийн хэрэгсэлтэй холбоотой зөрчил өссөн гэв

Эм, эмнэлгийн хэрэгсэлтэй холбоотой эс үйлдэхүй, хориглосон 30 гаруй үйлдлийг Зөрчлийн тухай хуульд тусгаснаас хойш энэ оны есдүгээр сарын 15-ны байдлаар 71 зөрчил бүртгэгдэж, прокуророос хяналт тавьсан байна.

Зөрчлийн тухай хуулийн 6.6 дугаар зүйлийн «Эм, эмнэлгийн хэрэгслийн тухай хууль зөрчих», 6.4 дүгээр зүйлийн «Мансууруулах эм, сэтгэцэд нөлөөт бодисын эргэлтэд хяналт тавих тухай хууль зөрчих» гэсэн заалтуудын дагуу нийт 71 иргэн, хуулийн этгээдэд зөрчлийн хэрэг бүртгэх ажиллагаа явуулжээ. Үүний 39 нь нийслэлд, 32 нь орон нутагт шалгагдсан байна.

Эмийн нэр, төрөл жил ирэх тусам нэмэгдэж байгаа нь холбогдох хууль тогтоомж зөрчих тохиолдлыг нэмэгдүүлж байна.

2023 онд 143, 2024 онд 137, 2025 онд 177 эм, бэлдмэл шинээр бүртгэгдсэн бол эм, эмнэлгийн хэрэгсэлтэй холбоотой зөрчил 2023 онд 107, 2024 онд 178, 2025 онд 222 болжээ.

Зөрчил шалган шийдвэрлэх эрх бүхий албан тушаалтнууд 2026 онд 71 иргэн, хуулийн этгээдэд нийт 109.8 сая төгрөгийн торгох шийтгэл оногдуулснаас 57.9 сая төгрөг төлөгдөөд байна.

Торгох шийтгэлийн биелэлтийг зөрчил шалган шийдвэрлэх эрх бүхий албан тушаалтан хариуцдаг бөгөөд биелүүлээгүй тохиолдолд өөр төрлийн шийтгэлээр солиулах саналыг шүүхэд гаргаж шийдвэрлүүлэх хуулийн зохицуулалт бий.

Эм, эмнэлгийн хэрэгсэлтэй холбоотой зөрчилд эм зүйч, жор баригч, эмчээс гадна энэ салбарын бүтээгдэхүүнийг үйлдвэрлэх, худалдах, нийлүүлэх үйл ажиллагаа эрхэлдэг хүн, хуулийн этгээд холбогдон шалгагдах тохиолдол бүртгэгдсэн. Үүний зарим шалтгаан нь салбарын харилцааг зохицуулсан хууль тогтоомжийн талаар хангалттай мэдээлэл аваагүйтай холбоотойг Улсын Ерөнхий Прокурорын Газраас мэдээлсэн.