Египетийн телевизийн алдартай хөтлөгч хар тамхины хэргээр цаазаар авах ял сонслоо

Египетийн шүүх телевизийн алдартай хөтлөгч Сара Халифа болон бусад 11 хүнийг хар тамхитай холбоотой хэргээр цаазаар авах ял оноосныг тус улсын албан ёсны хэвлэлүүд мэдээлжээ.

39 настай Сара Халифа нь нийгмийн аюулгүй байдал, гэмт хэргийн асуудлыг хөнддөг "Mission Impossible" нэвтрүүлгээрээ алдаршсан юм.

Төрийн өмчийн "Аль-Ахрам" сонины мэдээлснээр, Кайрын шүүх Халифа болон бусад шүүгдэгчдийг "ашиг олох зорилгоор хар тамхи үйлдвэрлэх материал олж авч, зөвшөөрөлгүй галт зэвсэг, сум эзэмшиж, хадгалсан, зохион байгуулалттай гэмт хэргийн бүлэг байгуулсан" гэж үзэн дүүжлэн хороох ял оноожээ.

Шүүх ял оноохын өмнө Египетийн Их Муфтитай зөвлөлдсөн нь тус улсын хуулийн шаардлага юм. Шүүгдэгчид ялыг давж заалдах боломжтой гэж мэдээлсэн байна.

Мөрдөн шалгах ажлын хүрээнд эрх баригчид 750 кг мансууруулах бодис, түүхий эд, лаборатори болгон ашиглаж байсан хоёр байр, зөвшөөрөлгүй галт зэвсэг, сумыг илрүүлсэн гэнэ.

Түүнчлэн нэгэн залуу эрийг хулгайлж, биед нь халдсан хэргээр Халифа болон хамтрагчдад таван жилийн хорих ял оноосон байна.

Египет улсад 2025 онд 541 хүн цаазын ял сонссон гэж хүний эрхийн байгууллагууд мэдээлжээ.