Э.Батшугар: Томуугийн улиралд эмнэлгийн орны хүчин чадлыг хоёр дахин нэмэгдүүлсэн

Эрүүл мэндийн сайд Э.Батшугар засгийн газрын хуралдааны шийдвэрийг танилцуулж, томуугийн улиралд бэлтгэл хийж буй байдлын талаар мэдээлэв.

Э.Батшугар: "6-аас доош насны хүүхэд нь өвдсөн тохиолдолд эцэг эх, асран хамгаалагчид 5 хоногийн цалинтай чөлөө олгох, цахимаар ажиллуулах тогтоол батлагдлаа. Энэ нь төрийн байгууллагын алба хаагчдад хамаарна. Мөн хувийн хэвшлүүдийг ч бас уриалж байна."

Тус тогтоол арваннэгдүгээр сарын 1-нээс гуравдугаар сарын 1 хүртэл хэрэгжинэ.

Өнгөрсөн жил томуугаар өвдсөн хүмүүст 1200 орыг ашигласан бол энэ жил хоёр дахин олон орыг бэлдээд байна.

Сайдын хэлснээр, өмнө жилтэй харьцуулахад томуугийн халдвар их байна. Есдүгээр сараас гуравдугаар сар хүртэл дэгдэлтийн оргил үе үргэлжилнэ.

Томуутай тэмцэх хамгийн шилдэг арга бол вакцин гэдгийг онцлов. Өмнө жил 300 мянган вакцин оруулж ирсэн бол энэ жил 500 мянган вакцин оруулсан. Томуугийн вакцин тариулсан хүмүүс өвдсөн тохиолдолд хүндрэх магадлал 60-70 хувиар буурдаг.