Э.Батшугар: ОХУ-д гарсан халдварын нөхцөл байдал Монголд бага эрсдэлтэй

ОХУ-ын Эрхүү хотын тахал судлалын хүрээлэнгийн ажилтан халдварт өвчний улмаас амиа алдсан байж болзошгүй гэх мэдээлэл гарсны дараа Монгол Улсын мэргэжлийн байгууллагууд "Бага эрсдэлтэй" гэсэн дүгнэлт гаргасан талаар Эрүүл мэндийн сайд Э.Батшугар мэдээлэв.

Зоонозын Өвчин Судлалын Үндэсний Төвөөс мэдээлснээр, өчигдрийн байдлаар ОХУ-ын Иркутск муж, Иркутск болон Шелехов хотын ариун цэвэр, халдвар судлалын нөхцөл байдал тогтвортой байна.

Хавьтал болсон иргэдэд хийж буй эмнэлгийн ажиглалт дуусах шатандаа хүрсэн бөгөөд лабораторийн шинжилгээгээр COVID-19-ийн 2, риновирусын халдварын 2 тохиолдол илэрчээ. Бусад хавьтал болсон иргэдээс халдварт өвчин үүсгэгч бусад төрлийн эмгэг төрүүлэгч илрээгүй байна. Одоогийн байдлаар хавьтал болсон иргэдийн 60 хувийн эмнэлгийн ажиглалтыг дуусгажээ.

Нөхцөл байдлыг ОХУ-ын Хэрэглэгчийн эрхийг хамгаалах болон хүний сайн сайхны салбарын хяналтын холбооны алба Роспотребнадзор хяналтдаа байлгаж байна.

Эрүүл мэндийн сайд Э.Батшугар хил дээр халуун хэмжиж байгаа бөгөөд эрсдэлтэй, халуурсан тохиолдол илэрвэл тусгаарлах өрөө бэлдсэн байгаа гэв. Мөн албан ёсоор тарваган тахал гэсэн онош байхгүй байгаа, хурц хатгаа нь шинж гэж илэрсэн бөгөөд дээж авахад тахлын шинж илрээгүй гэх мэдээг ОХУ-аас өгсөн байна.