Донтолтоос 16 жил гарсан Д.Баянмөнх: Лам, бөөгөөр эмчлэх ойлголт байхгүй

Нийгэмд тулгамдаж буй донтолтын эсрэг "Сэргэлтийн дуу хоолой үндэсний хөдөлгөөн"-ийг "Амьдралын алхам, сэргэлтийн дуу хоолой" НҮТББ-аас зарлаж буйгаа мэдээллээ. Тус байгууллагын гишүүн Д.Баянмөнх архинд донтох эмгэгээр 10 гаруй жил өвчилж, сүүлийн 16 жил архигүй амьдарч байгаа тухайгаа ярьсан юм.

Тэрбээр донтолт нь бие махбодоос илүүтэй хүний сэтгэц, зан үйлтэй холбоотой гэдгийг онцлов. "Архи, мөрийтэй тоглоом, хар тамхи болон бусад төрлийн донтолт бие махбод гэхээс илүүтэй хүний сэтгэц, зан үйлтэй нягт холбоотой байдаг. Зан үйлийн эмгэгийг нэг эм уугаад бүрэн эмчилнэ гэж байхгүй" гэж тэр хэлсэн.

Лам, бөөд үзүүлэх нь шийдэл болохгүй

Д.Баянмөнх гэр бүлийн гишүүнээ архинаас гаргахын тулд лам, бөөд үзүүлдэг тохиолдол олон байдгийг дурдаад, энэ нь үр дүнгүй гэдгийг тодотгов. "Гэр бүлийн гишүүнээ архинаас гаргахын тулд лам, бөөгөөр үзүүлдэг тохиолдлууд нэлээд бий. Үнэндээ донтолтыг нэг шидтэн гарч ирээд шидэт саваагаараа дохиод кодолдог гэх ойлголт байхгүй" гэж тэр ярьсан.

Түүний хэлснээр, донтолт нь бүртгэгдсэн өвчин бөгөөд мөрийтэй тоглоом, компьютер тоглоомын донтолтыг албан ёсоор хүлээн зөвшөөрч, өвчин гэж зарласан байдаг. "Зан үйлийн эмгэг учраас 'мөрийтэй тоглохгүй болгоно' гэдэг эм тариа хаана ч байхгүй" гэж тэр нэмж хэлэв.

Харилцан туслах бүлгэмийн арга

Д.Баянмөнх Монголд харилцан туслах бүлгэмүүд хөгжиж байгааг дурдаад, өнгөрсөн хавраас мөрийтэй тоглоомын донтолттой хүмүүс twelve steps sponsorship аргаар бие биедээ тусалж байгааг онцлов. "Эдгээр харилцан туслах бүлгэмийн замаар эдгэрдэг аргыг өндөр хөгжилтэй улс орнууд хүлээн зөвшөөрсөн байхад манайд хөгжөөгүй" гэж тэр хэлсэн.

Энэ бол хайр халамжаар эмчлэгдэхэд маш хэцүү өвчин. Ихэнхдээ хайр халамж зохидоггүй.

Тэрбээр 16 жилийн турш зовлон нэгтэй хүмүүстээ тусалж ирсэн бөгөөд өнөөдөр олон зуун хүн хандаж байгаа учраас байгууллагын зарчмаар ажиллах шаардлагатай болсныг дурдав. "Манай байгууллага аливаа улс төр, ямар нэгэн шашны байгууллага биш эсвэл аль нэгэн эмчилгээний байгууллагыг сурталчлахын төлөө ажиллахгүй гэдгийг албан ёсоор хэлье" гэж тэр мэдэгдэв.

Донтолттой иргэдийг өвдсөн хүн гэж үзэх хэрэгтэйг тэр онцлоод, "Бид хамгийн их тэнэгтсэн, маш хэцүү хүмүүс мөн үү гэвэл мөн. Мал бол бараг алаад идчих юм сан гэдэг ийм хандлагаар ханддаг нь нууц биш. Бараг монгол айл өрх бүрд ийм зовлон бэрхшээлтэй хүн байдаг. Энэ бол манай нийгмийн тэмцвэл зохих, анхаарал тавих ёстой асуудал" гэж хэлсэн.