Долоо хоногт 8 гал түймрийн дуудлага бүртгэгдэж, 153 тохиолдол болжээ

Онцгой байдлын байгууллага энэ сарын 14-17-ны хооронд 4 аймаг, нэг дүүргийн нутаг дэвсгэрт ой, хээрийн гал түймрийн 8 дуудлага хүлээн авсан. 2026.09.17-ны 10:30 цагийн байдлаар гуравхан түймрийн унтраах ажиллагаа үргэлжилж байна.

2026 он гарсаар улсын хэмжээнд ой, хээрийн гал түймрийн 153 тохиолдол бүртгэгдэж, урьдчилсан байдлаар ойн 33.229 га, хээрийн 1.125.745 га, нийт 1.158.974 га талбай шатсан байна. Гуравдугаар сараас зургаадугаар сарын 30 хүртэл ойн түймэр 3.704 га, хээрийн түймэр 914.334 га, нийт 918.038 га талбайг хамарчээ.

ОХУ-ын нутаг, Монгол Улсын хилийн ойролцоо 2026.09.08-ны 21:29 цагт сансрын хиймэл дагуулын мэдээгээр илэрсэн түймэр энэ сарын 15-ны 19:45 цагт Хөвсгөл аймгийн Улаан-Уул сумын нутагт хил давж оржээ. Унтраахад Онцгой байдлын ерөнхий газар, Агаараас эрэн хайх, аврах 111 дүгээр анги, Хөвсгөл аймгийн Онцгой байдлын газар, Хилийн цэргийн дугаар анги, Баянзүрх, Улаан-Уул сумын мэргэжлийн анги, орон нутгийн байгаль хамгаалагч нийт 36 алба хаагч ажиллаж байна.

Улаанбаатар хотын Баянзүрх дүүргийн 11 дүгээр хороо, Богдхан уулын Төр хурахын ам, «Их Халзангийн-Энгэр» гэдэг газар ойн түймэр гарсныг 09.16-ны 13:15 цагт мэдэгдсэн. Тус дүүргийн Онцгой байдлын хэлтсийн ГТУА 63, 35 дугаар анги, Нийслэлийн аврах анги, Хан-Уул дүүргийн Онцгой байдлын хэлтсийн ГТУА 14 дүгээр анги, Налайх дүүргийн Онцгой байдлын хэлтсийн ГТУА 28 дугаар ангийн алба хаагчид, Богдхан уулын дархан цаазат газрын Хамгаалалтын захиргааны албан хаагч нийт 66 хүн унтраах ажиллагааг зохион байгуулж, 2026.09.16-ны 18:15 цагт цурамд оруулан бүрэн унтраахаар ажиллаж байна. Урьдчилсан байдлаар 6 га орчим талбай шатсан байна.

Сүхбаатар аймгийн Эрдэнэцагаан сум, Хонгор 4 дүгээр баг, «Улаан хонхор» гэдэг газар аймгийн төвөөс зүүн урд зүгт 200 км, сумын төвөөс баруун хойд зүгт 20 км-т хээрийн түймэр гарсныг 2026.09.17-ны 07:20 цагт мэдэгдсэн. Түймэр 3 км урт, 500 метр өргөн тархсан бөгөөд 10:43 цагт цурамд оруулж, бүрэн унтраахаар нутгийн иргэд, Эрдэнэцагаан сум дахь Гал түймэр унтраах, аврах 47 дугаар ангийн нийт 19 иргэн, алба хаагч ажиллаж байна.

Намрын хуурайшилт ихтэй, хур тунадас бага байгаа энэ үед түймэр гарах нөхцөлийг бүрдүүлэхгүй, ой, хээрийн түймрийн аюулаас сэрэмжтэй байхыг анхааруулж, иргэн бүрийг хариуцлагатай байхыг сануулж байна. Ой, хээрт зорчихдоо асаасан гал, чүдэнз, тамхины гал, цог, түүдэг гал, үнс нурмыг бүрэн унтраах, халуун үнс, нурмыг таглаа бүхий нүх, саванд хийх, гэр сууц, хашаа хорооны гадуур түймрээс хамгаалах зурвас татах, хог, өвсийг ил задгай шатаахгүй байх, шашны зан үйл хийхдээ арц, хүж, зул асааж орхихгүй байх, түймрийн аюултай улиралд хог, хаягдлыг зөөж тээвэрлэх, хаяхдаа гал түймрийн аюулгүй байдлыг хангах шаардлагатайг анхааруулж байна.