Дани: Оросын хөлгөөс нисдэг тэрэг рүү дохионы пуужин харвасан

Балтийн тэнгист хөдөлгөөн хянаж байсан цэргийн нисдэг тэрэг рүү Оросын байлдааны хөлгөөс дохионы хоёр пуужин харвасныг Данийн эрх баригчид Мягмар гарагт мэдээлж, ОХУ-ын элчин сайдыг дуудаж уулзсан байна.

Даваа гарагт болсон энэ хэрэг “ердийн хяналт шалгалтын үйл ажиллагааны үеэр” гарсныг Данийн тал баталжээ.

Ерөнхий сайд Метте Фредериксен уг үйлдлийг “хариуцлагагүй”, “айлган сүрдүүлэх зорилготой” байсан гэж дүгнэсэн.

Данийн зэвсэгт хүчний мэдэгдэлд “Өнөөдөр агаарын цэргийн хүчний Fennec загварын нисдэг тэрэг Гедсер хотын ойролцоо олон улсын усанд байрлаж байсан Оросын фрегат хөлөг онгоцыг гэрэл зургаар баримтжуулах ердийн ажиллагааг гүйцэтгэж байх үед түүн рүү дохионы пуужин харвалаа” гэж өгүүлсэн байна. Хоёр дохионы пуужингийн нэг нь нисдэг тэрэгтэй ойрхон өнгөрснийг мөн дурдсан байна.

Оросын тал уг хэргийг “нарийвчлан шалгах”-аа амласан ч Данийн нисдэг тэргийг Оросын байлдааны хөлгийн ойролцоо “аюултай жолоодлого” үйлдсэн гэж буруутгасан.

Данийн гадаад хэргийн сайд Ларс Лёкке Расмуссен “хүлээн зөвшөөрөгдөхүйц үйлдлийн хил хязгаарыг аажмаар өөрчилж байгаа” Орос улсыг шүүмжилжээ.

Копенхагенд суугаа ОХУ-ын элчин сайд Владимир Барбин хэргийн нөхцөл байдлыг Москвагаас “нарийвчлан шалгана” гэж амласан боловч Данийн нисдэг тэргийг “өдөөн хатгасан үйлдэл” гаргасан гэж буруутгаж, “Энэ нь Данийн агаарын хүчний нисдэг тэрэгнүүд Оросын байлдааны хөлөг онгоцны ойролцоо аюултай маневр хийсэн анхны тохиолдол биш юм” гэж хэлсэн байна.

Балтийн тэнгист гарсан энэ хэрэг Литва улсын агаарын орон зайд нэвтэрсэн нисгэгчгүй онгоцыг НАТО-гийн сөнөөгч онгоцнууд буудаж унагасантай давхацсан. Түүнийг хөрш Беларусийн хоёр дахь том хот Каунасын ойролцоо хилийн хэсгээр нэвтэрсэн гэж үзэж байна.

Литвагийн эрх баригчид нисгэгчгүй онгоцны гарал үүслийг тогтоохоор ажиллаж байгаагаа мэдэгдсэн бол ерөнхийлөгч Гитанас Науседа “Орос улс Украины эсрэг түрэмгийллээ эрчимжүүлж байгаа энэ үед манай бүс нутгийн бэлэн байдал чухал ач холбогдолтой юм. Литва улс НАТО-гийн холбоотнуудтайгаа хамтран агаарын орон зайгаа хамгаалах болно” гэж сошиал хуудсаараа мэдэгдсэн байна.

Литва зүүн талаараа Оросын гол холбоотон Беларусьтай хил залгадаг бөгөөд бүс нутгийн Латви, Эстони улсуудын агаарын хилийг Украины нисгэгчгүй онгоцнууд зөрчсөн хэд хэдэн тохиолдол энэ онд гарч, эдгээрийг Оросын дрон эсэргүүцэх зэвсгийн нөлөөгөөр удирдлагаа алдсаны улмаас хил давсан гэж Украины тал тайлбарлаж байв.