CS2 тэмцээнд Монголын хоёр баг өрсөлдөнө

Цахим спортын Counter Strike-2 тоглоомын FISSURE Playground-3 тэмцээн энэ сарын 8-13-ны өдрүүдэд БНХАУ-ын Сүжоу хотод зохион байгуулагдана. Нэг сая ам.долларын шагналын сантай тус тэмцээнд 16 баг хэсэгт хуваагдаж өрсөлдөх бөгөөд түрүүлсэн баг 300 мянган ам.доллар авах юм.

Манай улсаас "The MongolZ" болон "5star eSports" багууд оролцоно. "The MongolZ" дэлхийн чансааны оноогоор эрхээ авсан бол "5star eSports" сонгон шалгаруулалтаас гарч ирсэн байна.

Тэмцээний эхний өдөр буюу энэ сарын 8-нд "The MongolZ" Бразилын MIBR багтай 13:30 цагаас, "5star eSports" Аргентины 9z Team багтай 11:00 цагаас тоглоно. Хэсгийн шатанд хоёр хожигдсон баг тэмцээнээ өндөрлүүлнэ.

"5star eSports" 2024 оноос Ази бүсийн тэмцээнүүдэд идэвхтэй оролцож, 2026 онд бүрэлдэхүүнээ шинэчилсэн. Багийн ахлагчаар NEUZ буюу Н.Ууганбаяр тоглож байна.

Харин "The MongolZ" баг бүрэлдэхүүндээ өөрчлөлт оруулж, Techno4K буюу Б.Содбаярыг түр сэлгээнд суулгаж, түүнийг cobrazera буюу У.Анарбилэг орлон тоглоно. "The MongolZ" одоогоор дэлхийн чансааны 18 дугаар байрт бичигдэж байгаа нь 2024 оны тавдугаар сараас хойших хамгийн доогуур үзүүлэлт юм.