Чингис хаан нисэх буудалд хууль бусаар импортолсон эмийн тариаг илрүүлжээ

Чингис хаан олон улсын нисэх буудалд 2026 оны 08 дугаар сарын 18-ны өдөр Нарита–Улаанбаатар чиглэлийн нислэгээр ирсэн Монгол Улсын гурван иргэний тээшинд гаалийн мэдүүлэггүй эм, эмийн бүтээгдэхүүн илэрч, хууль бусаар импортлохыг завдсан үйлдлийг илрүүлжээ.

Гаалийн хяналт шалгалтаар Монгол Улсын эмийн бүртгэлд бүртгэгдээгүй, тусгай зөвшөөрөл шаарддаг “Монжура” нэршилтэй, 2.5 мг, 5 мг, 7.5 мг-ийн гурван төрлийн нийт 1,483 ширхэг тариаг илрүүлэн саатуулж, холбогдох хууль, хяналтын байгууллагад шилжүүлсэн гэж Гаалийн ерөнхий газраас мэдээлэв.

Монгол Улсын эмийн бүртгэлд бүртгэгдээгүй эмийг худалдах, ханган нийлүүлэх, арилжааны зориулалтаар импортлох нь зорчигчийн хувийн хэрэглээний эмийг хилээр нэвтрүүлэх журмаас ялгаатай. Бүртгэлд ороогүй эмийг ердийн импортоор оруулах боломжгүй бөгөөд хуульд заасан тусгай нөхцөлд зөвшөөрөл шаардлага хангасан тохиолдолд л оруулах боломжтой.

Иймд иргэд гадаад улсаас эм, эмийн бүтээгдэхүүн авч зорчихдоо тухайн бүтээгдэхүүнийг Монгол Улсын эмийн бүртгэлд бүртгэгдсэн эсэх, хилээр нэвтрүүлэхэд тусгай зөвшөөрөл болон бусад шаардлага тавигдах эсэхийг урьдчилан тодруулж, гаалийн байгууллагад зохих журмын дагуу мэдүүлэхийг анхааруулж байна.