Чарльз хаан хунтайж Харри, Меган нарын Их Британид эргэн ирэхтэй холбоотой статусыг баталгаажууллаа

Их Британид эргэн ирсэн хунтайж Харри, Меган нарын статусыг хаан Чарльз өчигдөр албан ёсоор баталгаажуулсан байна. Хааны нэрийн өмнөөс засгийн газрын албан тушаалтнуудад хүргүүлсэн захидалд 2020 оноос хойш тэдэнд үйлчилж буй статус үргэлжилнэ гэдгийг мэдээлсэн нь тэд олон нийтийн өмнө ямар нэг үүрэг хүлээдэггүй хааны гэр бүлийн сул гишүүд хэвээр үлдэнэ гэсэн үг юм.

Хааны ордны хамгийн өндөр албан тушаалтан болох Лорд Чэмберлэйний гарын үсэгтэй захидалд Харри, Меган нарын зохион байгуулдаг буяны ажил тэдний хувийн арга хэмжээнд тооцогдож, аюулгүй байдлыг нь жирийн иргэдээс ялгаагүй харьяа цагдаагийн байгууллага хангана гэж заажээ.

“Эргэлзээ, төөрөгдлөөс зайлсхийхийн тулд Хаантан энэхүү мэдээллийг хуваалцахыг надад үүрэг болгосон юм” гэж Лорд Чэмберлэйн Захидалдаа бичсэн байна.

Харри, Меган нар хааны гэр бүлээс гарснаас хойш аюулгүй байдлын асуудал эмзэг сэдэв болж байсан бөгөөд Харри төрийн төсвөөс санхүүждэг цагдаагийн хамгаалалтаа сэргээлгэхээр удаан хугацаанд хөөцөлдөж байв. Харин одоо тэдний хамгаалалтыг сэргээх эсэхийг засгийн газрын дэргэдэх RAVEC (Royal and VIP Executive Committee) хороо шийдвэрлэх юм байна.