Ботаникийн цэцэрлэгт хүрээлэн орчимд баавгай үзэгдсэн тухай мэдээлэл гарч, алхалтаа хязгаарлахыг уриалав

Өнгөрсөн шөнө Улаанбаатар хотын Ботаникийн цэцэрлэгт хүрээлэнгийн орчимд баавгай орж ирсэн тухай мэдээлэл байгааг Монголын явган алхалтын холбоо сэрэмжлүүлэв.

Өнөө өглөө Гачуурт, Хужирбулан, Улиастай зэрэг суурьшлын бүсэд баавгай орж ирсэн талаар иргэд сошиал дээр сэрэмжлүүлэг бичлэгүүд оруулсан ч мэргэжлийн байгууллагуудаас албан ёсны мэдээлэл одоогоор өгөөгүй байна.

Үндэсний цэцэрлэгт хүрээлэн орчимд баавгай үзэгдсэн байж болзошгүй талаар албан ёсоор сэрэмжлүүлсэн байна.

Иймд нийт явган алхагчдыг хот орчмын ногоон бүс болон Богдхан уулын чиглэлд алхалтаа түр хязгаарлаж, онцгой анхаарал болгоомжтой байхыг уриалав.

Зөвлөмж

• Улаанбаатар хот орчмын ойн бүсэд алхалтыг аль болох хязгаарлаж, эрүүл мэндийн тэгш замын алхалт төлөвлөөрэй.
• Зэрлэг амьтан харвал ойртохгүй, зураг авах гэж оролдохгүй, тайван холдох.
• Албан ёсны мэдээ, сэрэмжлүүлгийг тогтмол дагаж мөрдөх.

Өөрийн болон бусдын аюулгүй байдлыг нэн тэргүүнд тавьж, хариуцлагатай алхахыг зөвлөлөө.