Баянгол, Чингэлтэй дүүргийн 5,000 айл хийн түлш хэрэглэж байна

Улаанбаатар хотын гэр хорооллын айл өрхөд есдүгээр сарын 15-наас эхлэн шахмал түлшийг 446 цэгээр худалдан борлуулж байна. Иргэд шахмал түлшийг Хотула аппликэйшн эсвэл иргэний үнэмлэхийн QR кодыг уншуулж авдаг бөгөөд нэг өрхөд долоо хоногт долоон шуудай түлш олгож байна.

Нийслэлийн Агаар, Орчны Бохирдолтой Тэмцэх Газрын дарга Д.Мөнхбаатар энэ тухай мэдээлэхдээ: "Өнгөрсөн жил Баянгол, Чингэлтэй дүүргийн 5,000 айлыг хийн түлшинд холбосон. Эдгээр айл хийн түлшээ хэрэглэдэг. Хийн түлшний борлуулалтын 27 цэг хэвийн ажиллаж байна" гэж хэлсэн.

Нийслэл хотод нийт 57 мянган тонн шахмал түлшний нөөцтэй бөгөөд энэ жил "Эрдэнэс Тавантолгой" ХК-ийн угааж баяжуулсан эрчим хүчний нүүрсээр шахмал түлш үйлдвэрлэж байгааг албаныхан мэдээлсэн.

Нийслэлийн долоон дүүрэгт шахмал түлш худалдаалж байгаа 446 цэгийн байршлыг график хэлбэрээр хавсаргав.