Багшийн мэргэжлийн тэтгэлэгт хугацааны хязгаар тогтооно

Боловсролын сайд Л.Энх-Амгалан оюутны тэтгэлгийн асуудлаар тодруулга хийхдээ багш мэргэжлээр суралцаж буй оюутны төлбөрийг бүрэн хариуцах шийдвэр гарсныг дурдсан. Гэвч биеийн тамир, нийгмийн ухааны багш нарын хэрэгцээ хангагдсан бол байгалийн ухаан, бага ангийн багшийн хомсдол үргэлжилж байна.

Тэрээр төрөөс олгож буй тэтгэлгийн хугацааг эхлэх, дуусах цэгтэй нь тодорхой болгох шаардлагатай гэж үзэв. "2012 онд ЭЕШ-ээр өндөр оноо авсан хүүхдийг багшаар сурвал төр даана гэх шийд гарсан. Энэ үед 5 мянган хүүхэд сурсан. Тэгээд яг судлаад үзэхээр 2.500 нь багшаа хийхгүй алга болчихсон. Тиймээс төрөөс хэрэгжүүлж байгаа хөтөлбөрүүдийг тодорхой хугацаанд эхлүүлж, дуусгадаг болгоно" гэж тэрээр хэллээ.

Тасралтгүй үргэлжлэл нь БЗС-д их ачаалал үүсгэж байгаа тул БЗС-ийг боловсролын хөгжлийн сан болгон цэгцлэхээр төлөвлөж байна. Оюутнуудын асуудлыг шийдэхийн өмнө төсвийн тодотголыг батлах шаардлагатай гэж сайд нэмж хэлэв.