Багануурын батарей хуримтлуурын станц энэ онд 43 сая кВт/ц эрчим хүч нийлүүлнэ

Багануур дүүрэгт байрлах 50 МВт-ын хүчин чадалтай батарей хуримтлуурын станц энэ оны наймдугаар сард төвийн бүсийн сүлжээнд 5.8 сая кВт/цаг эрчим хүч нийлүүлсэн байна. Уг станц энэ онд нийтдээ 43.1 сая кВт/цаг эрчим хүч нийлүүлэхээр төлөвлөсөн гэж Улаанбаатар хотын Хөгжлийн Корпораци ХК-иас мэдээлэв.

Станцыг БНХАУ-ын "Энвижн Энержи" компани 2024 онд барьж, тухайн оны арванхоёрдугаар сараас төвийн бүсийн нэгдсэн системд эрчим хүч нийлүүлж эхэлсэн юм. Бага ачааллын үед илүүдэл эрчим хүчийг хуримтлуулж, оргил ачааллын үед нийлүүлэх зориулалттай энэхүү станц нь өдөр, шөнийн цахилгаан хэрэглээний зөрүүг тэнцвэржүүлэхэд чухал үүрэг гүйцэтгэдэг.

Тодруулбал, төвийн бүсийн сүлжээнд өдрийн оргил ачаалал, шөнийн бага ачааллын хооронд 300-400 МВт эрчим хүчний зөрүү гардаг бөгөөд энэ нөөцийг хуримтлуулж, шаардлагатай үед нь нийлүүлдэг. Улаанбаатар хотын нэг өрхийн дундаж хэрэглээг 2 кВт.цаг гэж үзвэл, 50 МВт хүчин чадалтай энэхүү станц нь 25,000 айлыг дөрвөн цаг турш эрчим хүчээр хангах хүчин чадалтай гэсэн тооцоо байдаг.

Станцын бүтээн байгуулалтад нийслэлийн бондын 293.5 тэрбум төгрөг зарцуулсан талаар эх сурвалж мэдээлжээ.