Бага насны хүүхдийн томуугийн вакцины хугацааг 10 дугаар сарын 15 хүртэл сунгалаа

Нийслэлийн хэмжээнд улирлын томуугийн дархлаажуулалтад зорилтот бүлгийн 293,610 иргэнийг хамруухаар төлөвлөснөөс энэ сарын 2-ны байдлаар 69.2 хувьтай үргэлжилж байна гэж НЭМГ-аас мэдээлэв.

Анх энэ сарын 3-нд дархлаажуулалтын хугацаа дуусах гэж мэдээлж байсан ч 6 сартайгаас 6 хүртэлх насны хүүхдүүдийн улирлын томуугийн эсрэг дархлаажуулалтыг аравдугаар сарын 15-ны өдрийг дуустал үргэлжлүүлэхээр болжээ.

Түүнчлэн 6 сартайгаас 6 хүртэлх насны хүүхэдтэй ажилтан, албан хаагчдадаа хүүхдүүдээ дархлаажуулалтад хамруулах цаг гаргаж, дэмжлэг үзүүлэхийг албан байгууллага, ААН-үүдэд уриалав.

Иргэд өөрт хамгийн ойр өрхийн эмнэлэг болон эрүүл мэндийн төвд хандаж, томуугийн вакцинд хамрагдах боломжтой бөгөөд БНСУ-д үйлдвэрлэсэн 4 цэнт вакциныг тарьж байгаа юм.