Баавгай хүн рүү халдсан хэргээр нийслэлд агнах зөвшөөрөл олгожээ

Баавгай хүн рүү халдсан асуудлаар Байгаль орчин, уур амьсгалын өөрчлөлтийн яам, Онцгой байдлын ерөнхий газар, Нийслэлийн онцгой байдлын газар мэдээлэл өглөө.

БЗД-ийн 35-р хорооны нутаг дэвсгэр Улиастайн ам орчимд баавгай хүний амь насанд хүрсэн явдалд албаныхан эмгэнэл илэрхийлжээ.

2026 оны 10-р сарын 7-8-нд шилжих шөнийн 01:00 цагт Шуурхай удирдлагын төвийн 31-0005 дугаарын утсанд дуудлага ирж, Нийслэлийн байгаль орчны газар, Нийслэлийн цагдаагийн удирдах газар, Нийслэлийн түргэн тусламжийн төвийн баг, Нийслэлийн онцгой байдлын баг тухайн байршилд ажилласан байна.

Өнөөдөр үүрийн 04:00 цагт БЗД-ийн онцгой байдлын комисс хуралдаж, бэлтгэл бэлэн байдлыг хангах, баавгайн тандалт тоо хэмжээг тогтоох, үргээх, иргэдэд урьдчилан сэргийлэх ажлыг зохион байгуулахыг шийдвэрлэж шуурхай ажиллаж байна гэж мэдээлэв.

Улаанбаатар хотын ногоон бүсэд 2018 онд хоёр удаагийн дуудлага мэдээлэл, 2019 онд нэг дуудлага мэдээлэл бүртгэгдэж байсан бол энэ онд 24 удаагийн дуудлага мэдээлэл бүртгэгджээ.

БОУАӨЯ-аас өчигдөр бамбаруушаа дагуулсан эм баавгайг агнаж болохгүй, нас биед гүйцсэн хүний эрүүл мэндэд аюул учруулах баавгайг цагдаагийн байгууллагын удирдлага дор аюулгүй болго гэсэн чиглэл, зөвшөөрлийг нийслэлд өгөөд байгаа юм байна.

Иймд нийт 41 хүний бүрэлдэхүүнтэйгээр тухайн баавгайг эрэн хайх ажиллагааг явуулж байгаа аж.