Баавгай хот суурин газарт ойртсон 557 тохиолдол бүртгэгдэж, есөн баавгайг устгажээ

Улсын Онцгой Комиссын ээлжит хуралдаанд өвөлжилтийн бэлтгэл болон баавгайн асуудлыг хэлэлцсэн бөгөөд Шадар сайд Н.Номтойбаяр гарсан шийдвэрийн талаар мэдээлэл өглөө.

Тэрбээр "Хүрэн баавгай хот суурин газарт ойртож, иргэдэд аюул занал учруулж байгаатай холбогдуулан Засгийн газар тогтоол гаргасан" гэж хэлсэн.

Одоогийн байдлаар есөн баавгайг устгасан бөгөөд нийт 557 тохиолдол илэрчээ. Засгийн газрын тогтоолын хэрэгжилтийг хянахаас гадна УОК Ан амьтны тухай, Хил хамгаалах тухай, Эрүүгийн зэрэг хуулийн зохицуулалтыг тодорхой болгож, хэрэгжилтийг хангах чиглэлээр илүү өргөн хүрээнд ажиллах, газар нутгийн байршлыг өргөжүүлэх, урьдчилан сэргийлэх арга хэмжээ авахад шаардлагатай тоног төхөөрөмжийн санхүүжилтийг шийдвэрлэхээр болжээ.

Өчигдөр баавгай айлын гэр рүү дайрч, иргэний амь нас эрссэн. "УОК-ын даргын хувьд, Засгийн газрын нэрийн өмнөөс харамсаж буйгаа илэрхийлье" гэж Шадар сайд хэлсэн.

Тэрбээр "Айл бүрийн гадаа цагдаа, онцгой байдлын алба хаагчид, байгаль орчны байцаагч нарыг байлгах боломжгүй. Иргэд өөрсдөө анхаарал болгоомжоо сайжруулах шаардлагатай" гэж сануулсан.

Мөн хуурайшилтын үе эхэлж байгаа тул ойн түймрийн асуудал ихээр гарч байгааг дурдсан. Зүүн бүсэд хээрийн түймэр гарч, 103 алба хаагч ажиллаж байна.

"Засгийн газрын тогтоол шийдвэр нь урьдчилан сэргийлэх, аргагүй хамгаалалтын арга хэмжээ авах хүрээтэй. Гарсан шийдвэрийг далимдуулж, өөр байршилд өөр зорилгоор ан агнавал Эрүүгийн хууль үйлчилнэ" гэж тэрээр анхааруулсан.

Экологийн цагдаа, Байгаль орчны хамгаалалтын алба, сум, аймгийн онцгой комиссын дарга нарт чиглэл өгч байгаа бөгөөд хараа хяналт дор, нотлох баримттайгаар хамгаалалт хийхийг тэмдэглэсэн. Хэд хэдэн зөвшөөрөл олгосон ч дамлан зарах асуудал сонсогдож байгааг хэлсэн.

"Дайны хажуугаар дажин гэгчээр алга нь загатнасан, буу бариад өөрийгөө анчин гэж бодсон нөхөд байдаг. Тийм зүйл байхгүй. Аргагүй хамгаалалтаас бусад тохиолдолд ямар нэг байдлаар хориотой ан агнавал Эрүүгийн хууль хатуу үйлчилнэ" гэж Шадар сайд мэдэгдсэн. Түүнчлэн мал барьж, айл руу дайрч байгаатай холбоотойгоор нөхөн олговрын асуудал яригдсаныг дурдсан.