Б.Пүрэвдорж: Ахмадын тэтгэвэр нэмэгдвэл инфляц нэмэгдэнэ гэсэн ойлголт буруу

УИХ-ын дарга Б.Пүрэвдорж ахмадын тэтгэврийг нэмэх асуудлаар байр сууриа илэрхийлж, төсвийн тодотголыг яаралтай хэлэлцэх шаардлагатай гэж үзэж байна.

Тэрээр өнгөрсөн амралтын өдрүүдэд Өмнөговь аймгийн 4 суманд ажиллахдаа энэ асуудлыг хөндсөн. Өнгөрсөн 4 жилийн хугацаанд ахмадын тэтгэвэр нэмэх чиглэлээр 4-5 хууль батлуулсан гэдгийг дурдаад, төсөв, төсвийн тодотгол бүрээр ахмадуудын тэтгэврийг нэмэх ёстой гэсэн байр суурьтай байгаагаа илэрхийлэв.

Мөн 20, 21-р зуунд Монгол Улсын тусгаар тогтнолыг баталгаажуулах, хөгжлийн суурийг тавихад ахмадууд их хувь нэмэр оруулсан тул төр тэдний асуудлыг байнга шийдэж байх ёстой гэж тэрээр онцлов.

Төсвийн тодотголоор ахмадуудын тэтгэврийг нэмснээр 2 сарын дараа 0.1-0.2 хувийн инфляцид нөлөөлөхөөр байгаа. Тиймээс ахмадын тэтгэвэр нэмэгдсэнээр инфляц нэмэгдэнэ гэсэн буруу ойлголтоо толгойноосоо авч хаях хэрэгтэй.