Б.Пүрэвдагва: Гэр хороололд зургаан батарей хураагуур тавихаар ажиллаж байна

Улаанбаатар хотын дарга Б.Пүрэвдагва цаг үеийн асуудлаар тодруулга хийсэн байна.

Тэрээр нүхэн гарц байгаа ч зам дээгүүр гарах хэрэглээ байгааг дурдаад, нүхэн болон гүүрэн гарцын хэрэглээний судалгааны үр дүнг өчигдөр танилцуулснаа мэдэгдлээ. Зуны гурван сарын турш 573 төсөл, арга хэмжээ хэрэгжүүлж, өвөлжилтийн бэлтгэл 83 хувьтай байгааг онцлов.

Халаалтын улирал 9 дүгээр сарын 15-наас эхэлсэн бөгөөд 446 цэгээр түлш борлуулж байна. Мөн халаалт өгч эхэлсэн гэлээ.

"Томоохон цахилгаан станцуудаас гадна 10-20 мВт-ын жижиг цахилгаан эх үүсвэр батарей хураагуурыг гэр хорооллын зургаан цэг дээр тавих саналыг төлөвлөөд явж байна. Томоохон цахилгаан станцууд 2-3 жилийн хугацаатай баригддаг" гэж хотын дарга хэллээ.

Тухайлбал, Дулааны 5 дугаар цахилгаан станц 2028 онд ашиглалтад орно. Дамбадаржаагийн 70 мВт-ын станц ирэх жил ашиглалтад орох аж. Одоогийн хэрэглээ 2170 байгаа бөгөөд оргил ачааллын үед ачаалал нэмэгдэж, шөнийн цагт 1000-ын хэрэглээтэй байдаг гэв.

Эдгээр төслийг хүлээхгүйгээр үлдсэн 1000 мВт-ыг хуримтлуулж аваад оргил ачааллын үед гаргах байдлаар жижиглэсэн зургаан батарей хураагуурыг гэр хороололд тавих юм байна.