Б.Найдалаа: Өвлийн улиралд цахилгаан хязгаарлах, дулаан тасалдах эрсдэлтэй боллоо

Эрчим хүчний сайд Б.Найдалаа цаг үеийн асуудлаар тодруулга хийсэн байна. Энэ жилийн төсөвт тодотголоор 200 тэрбум төгрөг тавьсан нь хоёр зорилготой байсан гэж тэрээр хэлсэн.

Нэгдүгээрт, импортын өндөр үнэтэй цахилгаан эрчим хүчийг иргэдэд үнэ нэмэхгүйгээр хүргэх зорилготой байжээ. Хоёрдугаарт, өвлийг өнөтэй давах, цахилгаан хязгаарлахгүйн тулд засвар үйлчилгээнд зориулж мөнгө тавьсан байна.

Гэвч УИХ-ын гишүүн Ж.Баясгалан зарчмын зөрүүтэй санал гаргаснаар 13.8 тэрбум төгрөгийг өөр зориулалтад шилжүүлж өөрчилсөн гэж сайд мэдэгдэв.

Шууд тодорхой хэлэхэд, засвар үйлчилгээгээ энэ дүнгээр хийж чадахгүй гэсэн үг. Өвөл цахилгаан хязгаарлах, дулаан тасалдах эрсдэлтэй боллоо. Энэ хариуцлагыг Ж.Баясгалан гишүүн үүрэх үү.

Сайд цааш нь: "Эрчим хүчний салбарынхан улаан гараараа яаж өдөр шөнөгүй ажиллаж байгааг ойлгож байна уу. Ийм хариуцлагагүй явдал гарсанд харамсалтай байна. Хувийнхаа таалагдах, попрох гэсэн өчүүхэн зорилгоо бодож, бусад салбарыг бодохгүйгээр төсөвтэй холбоотой зүйл дээр хариуцлагагүй хандаж болохгүй" гэж хэлсэн байна.