Б.Бейсен: Сонсголын шинжээчдийг дарамтлах тохиолдол гарч байна

Хүнс, хөдөө аж ахуй, хөнгөн үйлдвэрийн салбарт төрөөс олгож буй дэмжлэг, урамшуулал, зээлийн хүүгийн татаасын хэрэгжилтийн талаар ерөнхий хяналтын сонсгол болж байна.

УИХ-ын гишүүн Б.Бейсен энэ үеэр салбарын дэмжлэгийн дүнг дурдав. Тэрээр 2008 оноос хойш урамшуулал 538 тэрбум, дэмжлэг 1.1 их наяд, хөнгөлөлттэй зээл 4.4 их наяд, зээлийн хүүгийн татаас 603 тэрбум төгрөг олгогдсоныг хэлэв.

Гэвч том компаниуд эдгээрийг авч, тариаланчид, малчид зээл авч чадахгүй байгааг тэрээр онцлов. Мөн урд хөршөөс хямд үнэтэй хүнсний ногоо орж ирснээс тариаланчид бүтээгдэхүүнээ борлуулж чадахгүй нөхцөл үүсдэг гэж нэмж хэлэв.

Сүүлийн зургаан жилийн хугацаанд хөдөө аж ахуйн зургаан сайд солигдлоо.

Зээл, тусламж зохих эзэндээ хүрч байгаа эсэхийг сонсголоор хэлэлцэж шийдэх шаардлагатайг Б.Бейсен дурдав. Авсан компаниудыг ил болгохоор шинжээчид ажиллаж байгаа бөгөөд сонсголд ажиллаж байгаа шинжээчдийг дарамтлах тохиолдол гарч байгааг тэрээр мэдэгдэв.