Азийн зуны спортын XX наадмын тамирчдыг алдаршуулах тайз Нагоя хотын төвд нээгдлээ

Азийн зуны спортын XX наадмыг зохион байгуулах хороо болон Азийн Олимпын Зөвлөл (АОЗ) хамтран Нагоя хотын төв цэцэрлэгт хүрээлэнд тамирчдыг алдаршуулах зорилгоор тусгай тайз зассан байна. Наадмын нээлт энэ сарын 19-нд болсон.

Азийн наадмын аваргууд болон Японы багаас медаль хүртсэн тамирчид өнөөдрөөс эхлэн тус тайзанд гарч, ярилцлага өгөх, олон нийтийн арга хэмжээнд оролцох боломжтой. Мөн тивийн олимпод оролцож байгаа улсууд өөрсдийн соёлын хөтөлбөрөө танилцуулах нөхцөлийг зохион байгуулагчид бүрдүүлсэн.

"One Asia World" уриатай тайзын нээлтэд Японы Үндэсний Олимпын Хорооны анхны эмэгтэй ерөнхийлөгч Сэйко Хашимото, Японы багийн ахлагч, олимпын нэг, дэлхийн гурван удаагийн аварга Косэй Иноуэ, Монголын Үндэсний Олимпын Хорооны ерөнхийлөгч Б.Баттүшиг болон бусад төлөөлөгчид оролцсон. Б.Баттүшиг нь АОЗ-ийн Соёлын хорооны даргаар ажилладаг.

Тайз нь Японы хамгийн "хөгшин" телевизийн цамхаг болох 76 жилийн түүхтэй "Mirai Tower"-ын чанх урд байрлах талбайд байгуулагдсан.

"Hisaya-odori Park"-т Азийн наадмыг дуустал тамирчдыг угтах хэсэг, тусгайлан зассан тайз, хүндэт зочдыг хүлээн авах өрөө, үзэгчдэд зориулсан тэмцээний шууд дамжуулалт, баярын жагсаал хийх талбай зэрэг долоон хэсгээс бүрдсэн байна.