АНУ Эрхүүгийн лабораторийн ажилтны нас баралтыг анхааралтай ажиглаж байна

Сибирийн тахал судлалын төвд ажиллаж байсан Оросын лабораторийн ажилтан нас барсан хэргийг АНУ "маш нухацтай" ажиглаж байгааг АНУ-ын ерөнхийлөгч Дональд Трамп өчигдөр мэдэгдсэн байна.

Төрийн нарийн бичгийн дарга Марко Рубио уг явдал уушгины тахал тархах эрсдэлтэй гэсэн болгоомжлолын улмаас Вашингтон нөхцөл байдлыг хянаж байгаа ч одоогоор айж сандрах шалтгаан байхгүй гэжээ.

«Хэрэв ийм төрлийн халдвар гадагш алдагдвал маш хурдан тархах эрсдэлтэй. Тиймээс бид нөхцөл байдлыг анхааралтай ажиглаж, хянаж байна. Энэ нь түгшүүр зарлах шалтгаан болно гэж би бодохгүй байна, гэхдээ анхаарлаа хандуулж, ажиглах шаардлагатай бөгөөд бид үүнийг хийж байна»

Эрхүү мужийн захирагч нас барсан эмэгтэйн шалтгааныг "тодорхойгүй шалтгаант уушгины үрэвсэл" гэж зарлаж, түүний "биологийн дээжээс" ажилтай холбоотой "ямар ч бичил биетэн" илрээгүйг мэдэгдсэн.

Баталгаажаагүй мэдээллээр тухайн эмэгтэй эмгэг төрүүлэгч агуулсан шинжилгээний хоолойг хагалсны дараа өвчилсөн байж болзошгүй гэсэн таамаг гарч байна.

Кремлийн хэвлэлийн төлөөлөгч Дмитрий Песков олон нийтийг "янз бүрийн цуу ярианд автахгүй байх"-ыг уриалж, Роспотребнадзорын албан ёсны мэдэгдэлд итгэхийг зөвлөжээ. Роспотребнадзорын мэдээлэлд үндэслэн Эрхүү мужийн захирагч Игорь Кобзев лабораторийн ажилтан нас барснаас хойш тахал судлалын хүрээлэнгийн бусад ажилтнууд эмнэлгийн тусламж хүссэн тохиолдол бүртгэгдээгүйг баталсан.

Хяналтын байгууллагын мэдээлснээр биологийн аюулгүй байдлын баг Эрхүү хот дахь Сибир, Алс Дорнодын Тахлын Эсрэг Хүрээлэнд шалгалт явуулсан ч ямар нэг онцгой нөхцөл байдал илрээгүй.

Оросын хэвлэлүүдийн мэдээлснээр "Дарья" гэж нэрлэсэн хорь гаруй насны эмэгтэй Пүрэв гарагт эмнэлэгт нас барсан бөгөөд тэр саяхан Монгол улстай хиллэдэг Буриадын бүс нутагт очоод ирсэн байжээ. Нас барсан эмэгтэйтэй хавьталд орсон гэх 200 орчим хүнийг урьдчилан сэргийлэх зорилгоор эмнэлгийн хяналтад авсныг өнгөрсөн долоо хоногт мэдээлсэн.

Редингийн Их Сургуулийн эсийн микробиологийн дэд профессор, доктор Саймон Кларк BBC Radio 4 сувгийн "PM" нэвтрүүлгээр ярихдаа "Yersinia pestis" нянгийн уушгины хэлбэр нь эмчлүүлэхгүй бол ихэнхдээ үхэлд хүргэдэг ч антибиотик эмчилгээгээр эдгээх боломжтойг хэлсэн.

«Уушгины тахал нь хүнээс хүнд халдварлах боломжтой тул санаа зовоож байна»

Тэрбээр халдварт өвчний дэгдэлт гарах үед хүмүүсийн санаанд хөл хорио, Ковид зэрэг зүйлс орж ирдэг ч энэ тохиолдолд тийм зүйл болохгүй гэж тайлбарлаж, тахал өвчин одоо ч оршсоор байгаа бөгөөд дэлхийн зарим хэсэгт хүмүүсийн эрүүл мэндэд аюул учруулсаар байгаа тул судлах шаардлагатай гэжээ.

Уг эмгэг төрүүлэгчийг биологийн зэвсэг болгон ашиглах зорилгоор судалж байсан байж болзошгүй эсэх талаар асуухад эрдэмтэн үүнийг боломжтой гэдгийг хүлээн зөвшөөрсөн.

«Энэ нь Орос улсад болж буй явдал тул хүмүүсийн санаанд тийм бодол орж ирж байгаа байх, гэхдээ миний өмнө дурдсан тайлбар илүү магадлалтай болов уу гэж би бодож байна»

Оросоос тахал тархах эрсдэлийн талаар Вашингтон ямар арга хэмжээ авах тухай асуултад Трамп Кремльтэй энэ талаар яриагүй байгаагаа хэлжээ. Тэрбээр "Тэд ийм асуудалтай тулгарсанд харамсаж байна. Бид туслах болно. Ийм төрлийн асуудалтай тулгарсан хэн бүхэнд бид үргэлж туслах болно" гэж хэлсэн байна.