АНУ-д үхлийн тариа хийлгээд амьд үлдсэн эмэгтэй шоронд эргэн ирлээ

Теннесси мужид цаазын ял гүйцэтгэх үеэр үхлийн тариаг хоёр удаа хийлгэсэн ч амьд үлдсэн Криста Пайкийг эмнэлгээс гаргаж, шоронд нь буцаасныг түүний өмгөөлөгчид Бямба гарагт мэдээлсэн байна.

50 настай Пайк сүүлийн 30 жил хоригдож буй "Дебра К. Жонсоны нэрэмжит Засан Хүмүүжүүлэх Төв"-д буцаж ирсэн тухай өмгөөлөгчид нь бичгээр мэдэгдэл гаргажээ.

"Тэрбээр ийм онцгой нөхцөл байдалд өөрт нь анхаарал халамж тавьсан яаралтай тусламжийн ажилтнууд болон эмнэлгийн багийнханд талархаж байна. Одоо тэр шоронд эмнэлгийн тусламж үйлчилгээг үргэлжлүүлэн авч байгаа бөгөөд бид түүний биеийн байдал сайжрах явцыг үргэлжлүүлэн хянах болно"

Пайк 1995 онд ангийнхаа сурагч Коллин Слеммерийг атаархал, үзэн ядалтын улмаас хөнөөсөн хэргээр есдүгээр сарын 30-нд цаазлуулах ёстой байсан ч пентобарбитал бодисын хоёр тун тариулсны дараа амьд үлдэж, эмнэлэгт хүргэгдсэн юм.

Тэрбээр хэсэг хугацаанд амьсгалын аппаратад холбогдсон бөгөөд өмгөөлөгчид нь амьд үлдэнэ гэж найдаагүй байв. Гэвч Пайк ухаан орж, ярьж, бусдын тусламжтайгаар алхаж эхэлснийг сүүлд тэд мэдээлж байлаа.

АНУ-ын Цаазын Ялын Мэдээллийн Төвийн баталснаар Пайк үхлийн тариа хийлгэсний дараа амьд үлдсэн анхны ялтан болжээ.

Теннесси мужийн шоронгийн захиргаа цаазын ажиллагааны явцад ямар алхам буруу болсон талаар тодорхой мэдээлэл өгөөгүй байна. Эмнэлгийн болон үхлийн тарианы мэргэжилтнүүд судсанд тарих хоолойд гарсан асуудлын улмаас эм нь цусны урсгалд орохын оронд биеийн бусад эд эрхтэнд хуримтлагдсан байж болзошгүй гэж үзэж байгаа.

Пайкийн өмгөөлөгчид шүүхэд гаргасан баримт бичигтээ "Цааз гүйцэтгэх багийн аль ч гишүүн судсанд тарих хоолойг буруу байрлуулсныг огт анзаараагүй бололтой" хэмээн дурджээ.

Амжилтгүй болсон уг цаазын ажиллагаа нь Теннесси муж ялыг зөв, хүнлэг аргаар гүйцэтгэж чадаж байгаа эсэхийг дахин анхаарлын төвд оруулж байна. Үүний дараа мужийн захирагч Билл Ли энэ онд товлогдсон өөр нэг цаазын ажиллагааг хойшлуулж, юу буруу болсныг шалгахыг үүрэг болгосон бол шоронгийн захиргааны дарга албан тушаалаасаа огцорсон.

Цаазын ажиллагаа эхэлснээс хойш таван минутын дараа Пайк толгойгоо өндийлгөж, гар нь өвдөж байгааг хэлж байв. Дараа нь ухаан алдсан мэт харагдаж байсан ч ажиллагаа эхэлснээс хойш бараг 90 минутын дараа хэвлэл мэдээллийнхнийг ажиглалтын өрөөнөөс гаргах хүртэл хүндээр амьсгалж байгаа нь сонсогдож байжээ. Удалгүй түүнийг түргэн тусламжийн автомашинаар эмнэлэгт хүргэсэн юм.