АН: Ерөнхий сайдын төсөв сонгуульд чиглэсэн, иргэдэд дэмжлэг үзүүлэхгүй

Ардчилсан нам ээлжит мэдээллийн цагаараа улсын төсөв, үнийн өсөлтийн талаар мэдээлэл хийв.

АН-ын нарийн бичгийн дарга Г.Лхагвадорж “Сонгуулийн жилүүдэд төсвийн зардал өсдөг. Энэ бол цэвэр сонгуульд зориулсан төсөв байхаар байна” гэж мэдэгдэв. Тэрбээр “10 жилийн өмнө 24 мянган төгрөгөөр авдаг байсан хүнсээ өнөөдөр 81 мянган төгрөгөөр авч байна” гэж онцолсон. 2016 онд мах 7300 төгрөг байсан бол 2026 онд 33 мянган төгрөг болсон. Иргэд махаа граммлаж авч байгааг тэмдэглэв.

Мөн “Баялгийн сангийн тухай хуулиа ноцтой зөрчих хуулийн төсөл өргөн барьсан. Оюутолгойгоос орж ирээгүй 3 их наяд төгрөг нь ард түмэнд очих ёстой мөнгө” гэж Г.Лхагвадорж хэлэв. Энэ мөнгийг хуримтлалын сангаар дамжуулан иргэний нэрийн дансанд оруулах ёстойг тэрбээр тодотгож, төсөвт татах гэж байгааг шүүмжилсэн. Түүний хэлснээр, “Энэ мөнгөөрөө VI цахилгаан станц барина гэнэ. Монгол улс V цахилгаан станцын шаваа тавиад 30 жил болж байна. Эхлээд тэрийгээ дуусгаач ээ.”

УИХ-ын гишүүн Ө.Шижир “2027 оны Ерөнхий сайд Н.Учралын өргөн барьсан төсөв бол есөн шид нь бүрдсэн төсөв болсон” гэж үзэж, “Сүүлийн 10 жил Монгол улс мөнгөгүйн биш мөнгөтэйний зовлонг эдэлж байна” гэв. 2024 онд Засгийн газар 14, нийслэл 24 мега төсөл ярьсан ч хэрэгжсэн төсөл байхгүй, тооцооллын алдаанаас иргэдийн амьдрал дордож байгааг гишүүн шүүмжилсэн.