25-р тусгай сургууль хүчин чадлаас хэтэрсэн сурагчидтай

Нийслэлийн 25-р тусгай сургууль хамгийн ихдээ 220 хүүхэд хүлээн авах багтаамжтай ч одоогоор 280 хүүхэд суралцаж байна. Улмаар анги танхим хүрэлцэхгүй тул хоёр ээлжээр хичээллэхээс өөр аргагүй болжээ. Тусгай сургуулиуд нэг ээлжээр хичээллэж, үдээс хойш нэмэлт сургалт явуулах нь илүү үр дүнтэй гэдгийг мэргэжилтнүүд хэлж байна.

Сургуулийн захирал Ц.Гэрэлмаа хэлэхдээ, “Манай сургууль 1967 онд байгуулагдсан. Өмнө нь хоёр ээлжийн нэгдүгээр анги хүлээж авдаг байсан бол энэ жил дөрвөн ээлжийг хүлээж авлаа. Энэ нь жил ирэх тусам хөгжлийн бэрхшээлтэй хүүхдүүд олширч байгааг илтгэж байна” гэв. Тэрбээр анги танхим хүрэлцэхгүйн улмаас хоёр ээлжээр хичээллэхээс өөр аргагүй болсныг онцоллоо.

Захирал Ц.Гэрэлмаа сургуулийн өргөтгөл бариулах саналыг олон удаа холбогдох байгууллагад хүргүүлсэн ч одоогоор шийдэлд хүрээгүй байгааг хэлжээ. Эцэг эхийн төлөөлөл сургуулийн гадаах талбай бага учраас өргөтгөл барихад хүндрэлтэй байж болохыг дурдаад, спорт талбай байхгүй тул хүүхдүүд тэмцээн уралдаанд өөр сургууль руу явах шаардлагатай болдог талаар ярив.

Мөн эцэг эхийн төлөөлөл хөгжлийн бэрхшээлтэй хүүхдийн тоо нэмэгдэж буй учраас сургуулийн байр хүрэлцэхгүй болсныг онцлоод, нэг ээлжээр хичээллэж, үдээс хойш хэл заслын нэмэлт хичээл оруулахыг хүсч байгаагаа илэрхийлэв.

Сургуулийн захирлын зүгээс зөвхөн бага ангиудад хэл заслын хичээл оруулдаг ч есдүгээр анги төгстөл нь хэл заслын хичээл орох шаардлага үүсээд байгааг эцэг эхчүүд хэлж байна. Тэд сургалтын хөтөлбөрийг өөрчилж, сургуульд ноогдох багшийн орон тоог шинэчлэх цаг болсныг онцоллоо.