2026 оны төсвийн тодотгол: иргэдэд нөлөөлөх таван өөрчлөлт

2026 оны төсвийн тодотголд иргэдийн амьдралд шууд нөлөөлөх хэд хэдэн өөрчлөлт багтсан байна.

Суурь тэтгэвэр

2027 оноос хэрэгжихээр төлөвлөж байсан суурь тэтгэврийг наашлуулж, 2026 оны 11 дүгээр сарын 1-нээс олгож эхэлнэ. Ингэснээр 435 мянган ахмад настан сар бүр 100-300 мянган төгрөгийн суурь тэтгэвэр нэмж авах бөгөөд ахмадуудын дундаж тэтгэвэр 1,188,800 төгрөгт хүрэхээр байна.

Төрийн үйлчилгээний салбарын цалин

Салбар хоорондын цалингийн зөрүүг арилгах зорилгоор 11 дүгээр сарын 1-нээс цалингийн өсөлтийг 50 хувьд хүргэж жигдрүүлнэ. Эрүүл мэндийн салбарын цалинг 20 хувиар, соёл, спорт, цаг уур зэрэг бусад салбарын цалинг 50 хувиар нэмэхээр тусгажээ.

Эрчим хүчний тариф

Импортын цахилгааны үнийн өсөлтөөс хэрэглэгчдэд ирэх дарамтыг бууруулахын тулд улсаас 107.3 тэрбум төгрөгийн татаас олгоно. Иргэдийн цахилгаан, дулааны үнийг нэмэхгүй бөгөөд станцуудын их засварт 92.7 тэрбум төгрөг нэмж зарцуулан хангамжийг тогтворжуулна.

Шатахуун, хүнсний үнэ

Автобензин, дизель түлшний гаалийн болон онцгой албан татварыг 0 төгрөг буюу 0 хувь болгож тогтоосноор шатахууны үнийг тогтвортой барина. Мөн мах, гурил, хүнсний ногооны үнийн хөөрөгдлөөс сэргийлж, стратегийн нөөц бүрдүүлэхэд 150 тэрбум төгрөгийн санхүүгийн дэмжлэг үзүүлнэ.

Боловсрол

Хүүхэд бүрд тэгш боловсрол олгож, сургуулиудын ачааллыг бууруулахад 50 тэрбум төгрөг зарцуулна. Нийслэлийн өндөр ачаалалтай байршлуудад сургуулийн зориулалттай 22 барилга түрээсэлж, 500 анги танхимыг шинээр тохижуулна.