2026-2027 оны хичээлийн жилийн улсын олимпиадын хуваарийг батлав

2026-2027 оны хичээлийн жилд зохион байгуулах улсын олимпиадуудын хуваарь, товыг баталсан талаар Боловсролын ерөнхий газар мэдээллээ.

Олимпиадын ерөнхий хороо 2026 оны есдүгээр сарын 11-ний өдөр хуралдаж, дараах асуудлуудыг хэлэлцэн шийдвэрлэсэн. Тухайлбал: олимпиадын ерөнхий хорооны бүрэлдэхүүний цаашдын баримтлах чиглэл, уялдаа холбоотой хамтран ажиллах асуудал; 2025-2026 оны хичээлийн жилд зохион байгуулагдсан Улсын болон Олон улсын олимпиадуудын нэгдсэн үр дүн, цаашид анхаарах санал зөвлөмж; 2026-2027 оны хичээлийн жилийн олимпиадын хуваарь, товыг тогтоох асуудал.

Хуваарь, товыг тогтоохдоо Аймаг, нийслэлийн Боловсролын газар, хэлтсүүд болон Боловсролын яамны саналыг үндэслэн хэлэлцэж, Боловсролын сайдад танилцуулснаар баталсан байна.

Олимпиадыг Боловсролын ерөнхий газрын даргын 2023 оны А/420 дугаар тушаалын хавсралтаар батлагдсан “Улсын олимпиад зохион байгуулах журам”-ын дагуу Ерөнхий хороо болон Дэд хороо хариуцан зохион байгуулдаг.