13 настай Хятадын тамирчин Азийн наадмын эмэгтэй MVP болжээ

Японы Нагоя хот, Айчи мужид зохион байгуулагдсан Азийн наадмаар гурван төрөлд дээд амжилт шинэчилсэн Хятадын 13 настай усанд сэлэлтийн тамирчин Юү Зиди эмэгтэй "Шилдэг тамирчин" (MVP) болсныг AFP мэдээлэв.

200 метрийн эрвээхэй сэлэлт, 200 болон 400 метрийн холимог сэлэлтийн төрлүүдэд наадмын дээд амжилт тогтоосон тэрбээр 2028 оны Лос-Анжелесын Зуны Олимпын наадамд гялалзах ирээдүйтэй тамирчин болж байна.

Өнгөрсөн онд 12 настайдаа буухиа сэлэлтийн төрөлд хүрэл медаль хүртэж, усанд сэлэлтийн дэлхийн аварга шалгаруулах тэмцээний түүхэн хамгийн залуу медальтан болж байв.

Ням гарагт өргөмжлөлөө хүртсэний дараа сэтгүүлчидтэй уулзахдаа тэрбээр "Хүмүүсийн ярьдаг шиг гоц авьяастан гэж би өөрийгөө бодохгүй байна" гэж хэлжээ. Цааш нь "Би шаргуу бэлтгэлээ үргэлжлүүлж, өөрийгөө сорьж, Азийн залуу тамирчидтай хамтран ажиллахын зэрэгцээ илүү олон залуучуудыг спорт, ялангуяа усанд сэлэлтэд дурлаж, хичээллэхэд нь урам зориг өгөх болно" гэж ярьсан байна.

Эрэгтэйчүүдийн ангилалд 100 болон 200 метрийн гүйлтийн төрөлд хос ялалт байгуулсан Тайландын 20 настай тамирчин Бунсон Пурипол "Шилдэг тамирчин"-аар шалгарсан байна.

25,000 долларын шагналын мөнгөө юунд зарцуулах тухай асуултад тэрбээр "Энэ мөнгийг гэр бүлдээ болон ирээдүйн зорилгодоо хүрэхэд чиглэсэн өөрийгөө хөгжүүлэх үйлсэд зарцуулна" гэж хариулжээ.

100 болон 200 метрийн зайн гүйлтэд Азийн наадмын дээд амжилтыг шинэчилсний дараа тэр Лос-Анжелесын олимпыг зорих зорилготой байгаа аж. "Энэ удаагийн тэмцээнд дэлхийн хэмжээний олон тамирчин оролцсон тул 'Шилдэг тамирчин'-аар шалгарсан нь Лос-Анжелест медалийн тавцанд гарах боломжтой гэх итгэлийг надад төрүүлж байна" гэж Пурипол хэлсэн байна.