13 настай Хятад тамирчин Азийн наадмын дээд амжилт тогтоож, алт авлаа

Азийн наадмын нээлтийн өдөр 200 метрийн эрвээхэй сэлэлтийн төрөлд Хятадын 13 настай Юү Зиди түрүүлж, дээд амжилтыг шинэчлэн тогтоожээ. Түүний цаг 2 минут 05.08 секунд байсан бөгөөд энэ нь анхны том тэмцээнээсээ алтан медаль зүүсэн гэсэн үг.

Түүний үзүүлэлт нутаг нэгт Жан Юфэйн гурван жилийн өмнөх дээд амжилтаас хагас секундээр хурдан байж, Азийн наадмын шинэ рекорд болсон байна.

2028 оны Лос-Анжелесийн Зуны Олимпод амжилт гаргах ирээдүйтэй тамирчны тоонд багтах Юү энэ удаа багийн тамирчин Чан Моханаас гурван секунд гаруй түрүүлж барианд оржээ.

Медаль гардуулсны дараа хэвлэлд өгсөн ярилцлагад тэр “тийм ч сайн амжилт гаргаж чадсангүй”, “эрвээхэй сэлэлтийн техник маань бага зэрэг дутагдалтай байгаа” гэжээ.

“Би үүнээс ч хурдан сэлж чадна гэдэгтээ итгэлтэй байна. Энэ удаа би өөрийн үзүүлэлтийг 0.9 секундээр ахиуллаа. Дараагийн удаа илүү амжилт үзүүлж чадна гэж бодож байна” гэж тэр нэмж хэлсэн байна.

Юү Азийн наадмаас хувийн төрлөөр дахин хоёр уралдаанд оролцох бөгөөд өнгөрсөн жил дэлхийн аварга шалгаруулах тэмцээнд Хятадын 4x200 метрийн чөлөөт буухиа багийн бүрэлдэхүүнд хүрэл медаль зүүж, тус тэмцээний хамгийн залуу тамирчин болж байв.